ក្រុមហ៊ុនផលិតនឹងត្រូវបង្ខំឱ្យបង្កើតដំណោះស្រាយសាកថ្មជាសកលសម្រាប់ទូរស័ព្ទ និងឧបករណ៍អេឡិចត្រូនិចតូចៗ ក្រោមច្បាប់ថ្មីមួយដែលស្នើឡើងដោយគណៈកម្មការអឺរ៉ុប (EC)។

គោលបំណងគឺដើម្បីកាត់បន្ថយកាកសំណល់ដោយលើកទឹកចិត្តអ្នកប្រើប្រាស់ឱ្យប្រើប្រាស់ឆ្នាំងសាកដែលមានស្រាប់ឡើងវិញនៅពេលទិញឧបករណ៍ថ្មី។
សំណើនេះបាននិយាយថា ស្មាតហ្វូនទាំងអស់ដែលលក់នៅសហភាពអឺរ៉ុប ត្រូវតែមានឆ្នាំងសាក USB-C។

ក្រុមហ៊ុន Apple បានព្រមានថា ការផ្លាស់ប្តូរបែបនេះនឹងប៉ះពាល់ដល់នវានុវត្តន៍។

ក្រុមហ៊ុនបច្ចេកវិទ្យាយក្សនេះគឺជាក្រុមហ៊ុនផលិតស្មាតហ្វូនដ៏សំខាន់ដែលប្រើប្រាស់រន្ធសាកថ្មផ្ទាល់ខ្លួន ដោយសារស៊េរី iPhone របស់ខ្លួនប្រើប្រាស់ឧបករណ៍ភ្ជាប់ "Lightning" ដែលផលិតដោយ Apple។

ក្រុមហ៊ុននេះបានប្រាប់ BBC ថា “យើងនៅតែមានការព្រួយបារម្ភថា បទប្បញ្ញត្តិតឹងរ៉ឹងដែលតម្រូវឱ្យប្រើឧបករណ៍ភ្ជាប់តែមួយប្រភេទ រារាំងការច្នៃប្រឌិតជាជាងលើកទឹកចិត្តវា ដែលនឹងធ្វើឱ្យប៉ះពាល់ដល់អ្នកប្រើប្រាស់នៅអឺរ៉ុប និងជុំវិញពិភពលោក”។

ទូរសព្ទ Android ភាគច្រើនភ្ជាប់មកជាមួយរន្ធសាកថ្ម USB micro-B ឬបានប្តូរទៅស្តង់ដារ USB-C ទំនើបជាងនេះរួចហើយ។

ម៉ូដែល iPad និង MacBook ថ្មីៗប្រើរន្ធសាកថ្ម USB-C ក៏ដូចជាម៉ូដែលទូរស័ព្ទលំដាប់ខ្ពស់ពីក្រុមហ៊ុនផលិតប្រព័ន្ធប្រតិបត្តិការ Android ដ៏ពេញនិយមដូចជា Samsung និង Huawei ផងដែរ។

ការ​ផ្លាស់ប្ដូរ​ទាំងនេះ​នឹង​អនុវត្ត​ចំពោះ​រន្ធ​សាក​នៅ​លើ​តួ​ឧបករណ៍ ចំណែក​ឯ​ចុង​ខ្សែ​ដែល​ភ្ជាប់​ទៅ​ឌុយ​អាច​ជា USB-C ឬ USB-A។

ការសិក្សាវាយតម្លៃផលប៉ះពាល់របស់គណៈកម្មការក្នុងឆ្នាំ ២០១៩ បានរកឃើញថា ប្រហែលពាក់កណ្តាលនៃឆ្នាំងសាកដែលលក់ជាមួយទូរស័ព្ទចល័តនៅសហភាពអឺរ៉ុបក្នុងឆ្នាំ ២០១៨ មានឧបករណ៍ភ្ជាប់ USB micro-B ខណៈដែល ២៩% មានឧបករណ៍ភ្ជាប់ USB-C និង ២១% ជាប្រភេទឧបករណ៍ភ្ជាប់ Lightning។

ច្បាប់ដែលបានស្នើឡើងនឹងអនុវត្តចំពោះ៖

ស្មាតហ្វូន
ថេប្លេត
កាមេរ៉ា
កាសស្តាប់ត្រចៀក
ឧបករណ៍បំពងសម្លេងចល័ត
ម៉ាស៊ីនហ្គេមវីដេអូដៃ