Производителите ќе бидат принудени да создадат универзално решение за полнење на телефони и мали електронски уреди, според ново правило предложено од Европската комисија (ЕК).

Целта е да се намали отпадот преку охрабрување на потрошувачите повторно да ги користат постојните полначи при купување нов уред.
Сите паметни телефони што се продаваат во ЕУ мора да имаат USB-C полначи, се вели во предлогот.

„Епл“ предупреди дека таков потег би им наштетил на иновациите.

Технолошкиот гигант е главен производител на паметни телефони што користи прилагоден порт за полнење, бидејќи неговата серија iPhone користи конектор „Lightning“ направен од Apple.

„Остануваме загрижени дека строгата регулатива што налага само еден вид конектор ја задушува иновацијата, наместо да ја охрабрува, што пак ќе им наштети на потрошувачите во Европа и низ целиот свет“, изјави фирмата за Би-Би-Си.

Повеќето Android телефони доаѓаат со USB micro-B порти за полнење или веќе се префрлиле на посовремениот USB-C стандард.

Новите модели на iPad и MacBook користат USB-C порти за полнење, како и моделите на телефони од висока класа од популарните производители на Android како што се Samsung и Huawei.

Промените би се однесувале на приклучокот за полнење на телото на уредот, додека крајот на кабелот што се поврзува со приклучокот би можел да биде USB-C или USB-A.

Околу половина од полначите продадени со мобилни телефони во Европската Унија во 2018 година имале USB микро-B конектор, додека 29% имале USB-C конектор, а 21% Lightning конектор, покажа студијата за проценка на влијанието на Комисијата во 2019 година.

Предложените правила ќе важат за:

паметни телефони
таблети
камери
слушалки
преносни звучници
преносни конзоли за видео игри