Sa Review of Maritime Transport para sa 2021, ang United Nations Conference on Trade and Development (UNCTAD) miingon nga ang kasamtangang pagsaka sa mga bayranan sa kargamento sa container, kon magpadayon, mahimong mopataas sa presyo sa importasyon sa tibuok kalibutan og 11% ug sa presyo sa konsumidor og 1.5% tali karon ug sa 2023.

Mas dako ang epekto sa taas nga singil sa kargamento sa gagmay nga mga nag-uswag nga estado (SIDS), diin posibleng mosaka ang presyo sa importasyon og 24% ug ang presyo sa mga konsumidor og 7.5%. Sa mga dili kaayo naugmad nga mga nasud (LDC), ang lebel sa presyo sa mga konsumidor mahimong mosaka og 2.2%.

Sa katapusan sa 2020, ang mga bayranan sa kargamento misaka sa wala damha nga lebel. Kini makita sa spot rate sa Shanghai Containerized Freight Index (SCFI).

Pananglitan, ang spot rate sa SCFI sa ruta sa Shanghai-Europe wala pay $1,000 kada TEU niadtong Hunyo 2020, misaka ngadto sa mga $4,000 kada TEU sa katapusan sa 2020, ug misaka ngadto sa $7,552 kada TEU sa katapusan sa Nobyembre 2021. 

Dugang pa, ang mga bayranan sa kargamento gilauman nga magpabilin nga taas tungod sa padayon nga kusog nga panginahanglan inubanan sa kawalay kasiguroan sa suplay ug mga kabalaka bahin sa kaepektibo sa transportasyon ug mga pantalan.

Sumala sa pinakabag-ong report gikan sa Sea-Intelligence, usa ka kompanya sa datos ug advisory sa kadagatan nga nakabase sa Copenhagen, ang kargamento sa kadagatan mahimong molungtad og sobra sa duha ka tuig aron makabalik sa normal nga lebel.

Ang taas nga presyo makaapekto usab sa mga butang nga ubos og dugang nga bili sama sa muwebles, tela, sinina ug mga produkto nga panit, kansang produksiyon kasagarang gibahin-bahin sa mga ekonomiya nga ubos og sweldo nga layo sa mga dagkong merkado sa konsumidor. Ang UNCTAD nagtagna nga mosaka ang presyo sa mga konsumidor og 10.2% niini.

Ang Review of Maritime Transport usa ka pangunang report sa UNCTAD, nga gipatik matag tuig sukad niadtong 1968. Naghatag kini og pagtuki sa mga pagbag-o sa istruktura ug siklo nga nakaapekto sa pamatigayon sa dagat, mga pantalan, ug mga barko, ingon man usa ka halapad nga koleksyon sa mga estadistika gikan sa pamatigayon ug transportasyon sa kadagatan.